𝐆𝐚𝐜𝐡𝐚𝐠𝐮𝐚 𝐀𝐫𝐮𝐝𝐢 𝐌𝐞𝐳𝐚𝐧𝐢: 𝐕𝐢𝐨𝐧𝐠𝐨𝐳𝐢 𝐖𝐚𝐭𝐚𝐤𝐚 𝐊𝐢𝐧𝐝𝐢𝐤𝐢 𝐀𝐣𝐢𝐮𝐳𝐮𝐥𝐮.

^{By Felix Wanjala.}

Uamuzi wa Mahakama ya Rufaa kwamba Naibu Jaji Mkuu Philomena Mwilu hakufaa kuunda jopo la majaji lililosikiliza kesi ya kumwondoa mamlakani aliyekuwa Naibu wa Rais, Rigathi Gachagua, umeibua maoni tofauti kutoka kwa viongozi wa kisiasa.

Viongozi wa upinzani sasa wanamtaka Naibu wa Rais wa sasa, Profesa Kithure Kindiki, kujiuzulu, wakisisitiza kuwa Rigathi Gachagua ndiye anayestahili kushikilia wadhifa huo kwa mujibu wa sheria.

Kwa mujibu wa Katiba ya Kenya, Ibara ya 146(2)(b), nafasi ya Naibu wa Rais inaweza kuwa wazi endapo atafariki, atajiuzulu, au atabanduliwa kwa mujibu wa sheria.

Iwapo nafasi hiyo itakuwa wazi, rais anao wajibu wa kumteua mtu mwingine kushikilia nafasi hiyo, kwa idhini ya Bunge la Kitaifa. Katika mchakato huo, rais atapendekeza jina la mgombea mmoja ambalo litatumwa bungeni kwa uchunguzi na uidhinishaji.

Endapo atapitishwa, atakula kiapo na kuanza rasmi majukumu ya Naibu wa Rais.Akizungumza katika eneo la Juja hapo jana, Rigathi Gachagua alisisitiza kuwa ana imani na idara ya mahakama, akieleza kuwa anaamini Wakenya wataendelea kupata haki kupitia idara hiyo.