Vijana wa Ford Kenya Wamkaba Kalasinga: Atamke Msimamo Wake!

BY FELIX WANJALA.

Katika kikao kilichofanyika katika makao makuu ya chama cha Ford Kenya eneo bunge la Kanduyi, kaunti ya Bungoma, viongozi vijana wa chama hicho walimshinikiza Mbunge wa Kabuchai, Majimbo Kalasinga, kutoa msimamo wake rasmi kuhusu uanachama wake. Walisema ni muhimu kwa Kalasinga kufafanua iwapo bado ni mwanachama mwaminifu wa Ford Kenya au kama sasa anaegemea upande wa Gavana wa Trans Nzoia, George Natembeya.

Vijana hao walitoa wito kwa Katibu Mkuu wa chama, John Chikati, kuchukua hatua kali dhidi ya Kalasinga, wakimtaka amtimue kwa madai ya kukiuka katiba ya chama na kuonyesha ukosefu wa uaminifu kwa uongozi wa chama hicho kinachoongozwa na Spika wa Bunge la Kitaifa, Moses Wetang’ula.

Aidha, walisisitiza umuhimu wa kudumisha amani katika kipindi hiki cha kuelekea uchaguzi mdogo wa eneobunge la Chwele-Kabuchai uliopangwa kufanyika tarehe 27 Novemba mwaka huu. Walihimiza viongozi wote kushiriki kampeni kwa njia ya amani na kuepuka mivutano ya kisiasa inayoweza kuchochea ghasia.

Viongozi hao pia walikumbusha kuwa ili mtu awe mgombea halali wa chama cha Ford Kenya, ni lazima atimize masharti yafuatayo:

• Awe mwanachama halali wa chama
• Awe na uzoefu na awe ameshiriki kikamilifu katika shughuli za chama
• Awe na sifa za kisheria zinazohitajika
• Apitie mchakato rasmi wa uteuzi au uchaguzi
• Aunge mkono malengo na ajenda ya chama
• Ajaze fomu rasmi za kugombea nafasi husika

Mvutano huu unaashiria changamoto zinazokikumba chama hicho kikongwe, huku vijana wakionyesha nia ya kulinda misingi na maadili ya Ford Kenya dhidi ya kile wanachokiona kama usaliti wa ndani