Siaya Yatia Gari Kilimo:Wakulima Kufaidi Miradi Mipya

BY SIMIYU VIONA

Serikali ya Kaunti ya Siaya imewekeza zaidi kwenye kilimo kwa kuanzisha miradi mipya ya umwagiliaji, mafunzo na kuongeza thamani ya mazao. Lengo ni kuimarisha usalama wa chakula na kuinua kipato cha wakulima vijijini.

Zaidi ya wakulima elfu tatu wanatarajiwa kunufaika. Maeneo ya umwagiliaji yamepewa kipaumbele ili wakulima wazalishe hata wakati wa ukame, huku wakitolewa mafunzo ya kisasa ya kilimo na ufugaji.

Akizungumza wakati wa uzinduzi, Gavana James Orengo alisema kilimo ndio uti wa mgongo wa uchumi wa Siaya. “Lazima tuwawezeshe wakulima kwa teknolojia, mafunzo na masoko bora ili waongeze uzalishaji,” alisema.

Wizara ya Kilimo imeahidi kupeleka pembejeo kwa wakati na huduma za ugani. Pia serikali inafungua masoko mapya ndani na nje ya kaunti ili wakulima wauze kwa bei nzuri.

Wakulima wameipongeza hatua hiyo wakisema itawasaidia kukabiliana na mabadiliko ya tabianchi na kuongeza mavuno.Viongozi sasa wanawasihi wakazi kushiriki kikamilifu ili Siaya ifikie kiwango cha juu cha uzalishaji.