TANDAO MEDIA NEWS

Jiji la Nairobi limekuwa mwenyeji wa kongamano la kawi safi lililowaleta pamoja viongozi wa serikali, wawekezaji na wataalamu wa sekta ya nishati kujadili mbinu za kuimarisha matumizi ya nishati jadidifu nchini.

Washiriki walisisitiza umuhimu wa kuongeza uwekezaji katika miradi ya nishati ya jua, upepo na teknolojia rafiki kwa mazingira ili kupunguza gharama ya umeme na kukabiliana na athari za mabadiliko ya tabianchi. Viongozi walieleza kuwa matumizi ya kawi safi yana nafasi kubwa katika kukuza uchumi wa taifa na kutoa suluhisho la muda mrefu kwa changamoto ya upatikanaji wa umeme hasa mashambani.

Mwenyekiti wa Kenya Green Hydrogen Alliance, Catherine Irura, alisema teknolojia ya kisasa inaweza kuharakisha upatikanaji wa nishati safi kwa wananchi wengi zaidi. Waziri wa Kawi, Opiyo Wandayi, alisisitiza kuwa serikali imejitolea kushirikiana na sekta binafsi kuongeza miradi ya nishati safi kote nchini. Balozi wa Ujerumani nchini Kenya, Sebastian Groth, aliongeza kuwa ushirikiano wa kimataifa ni muhimu katika kuimarisha miradi ya nishati jadidifu barani Afrika.

Wadau walieleza kuwa matumizi ya nishati jadidifu yanaweza kupunguza utegemezi wa mafuta ya kisukuku ambayo yamekuwa yakichangia uchafuzi wa mazingira duniani. Aidha, wataalamu walitoa wito kwa serikali kuongeza programu za elimu na uhamasishaji kwa wananchi kuhusu umuhimu wa kutumia teknolojia za kawi safi katika shughuli za kila siku.