Wakazi wa Chyulu na Tsavo Wapinga Mradi wa Ua wa Umeme

BY ELIJAH WANYAMA

Wakazi wanaoishi karibu na mfumo wa ikolojia wa Chyulu Hills na Tsavo wamepinga vikali mpango wa serikali wa kujenga ua wa umeme, wakisema mradi huo unaweza kuathiri maisha yao ya kila siku, matumizi ya ardhi, na shughuli za kiuchumi zinazowawezesha kujikimu.

Wananchi hao wamelalamika kuwa hawakushirikishwa ipasavyo kabla ya kuanza kwa hatua za awali za mradi, jambo linaloibua wasiwasi kuhusu namna maamuzi yanavyofanywa juu ya ardhi waliyoitumia kwa vizazi vingi. Wanasema miradi ya aina hiyo inapaswa kuhusisha jamii tangu mwanzo ili kuepusha madhara kwa wananchi.

“Hatukushirikishwa kabisa, na bado tunashangaa kuona mipango inaendelea bila maoni yetu kuchukuliwa kwa uzito. Ardhi hii ni ya jamii, na maisha yetu yanategemea malisho na njia za mifugo,” alisema mkazi mmoja wa Tsavo.Wafugaji wanasema ua huo unaweza kufunga njia za asili za mifugo zinazotumika kwa miaka mingi kuvusha mifugo kati ya malisho na vyanzo vya maji, hali ambayo inaweza kusababisha migogoro mipya ya matumizi ya ardhi.

Wakazi pia wanakiri changamoto ya wanyamapori, hususan tembo wanaoharibu mazao, lakini wanasema suluhisho halipaswi kuwabana au kuwapokonya haki ya kutumia ardhi. “Tunahitaji mazungumzo ya pamoja ambayo yataweka uwiano kati ya uhifadhi na maisha ya wananchi,” alisema mkazi wa Chyulu.

Kwa mujibu wa wataalamu wa uhifadhi, mfumo wa Tsavo–Chyulu ni korido muhimu ya wanyamapori nchini Kenya, inayowawezesha kuhama kutafuta maji, chakula na maeneo ya kuzaliana. Wanaonya kuwa mabadiliko ya miundombinu yanaweza kuathiri kwa kiasi kikubwa uhamaji wa wanyama.

Wakazi sasa wanaitaka serikali na mamlaka husika kusitisha utekelezaji wa mradi hadi pale tathmini ya kina ya athari za kijamii, kiuchumi na kimazingira itakapofanyika, na jamii kushirikishwa kikamilifu.

Mjadala kuhusu ujenzi wa ua wa umeme katika Chyulu na Tsavo unaendelea kushika kasi, huku wakazi wakisisitiza kuwa hawatakubali mradi huo bila ridhaa na ushirikishwaji wa moja kwa moja.